Rheinland-Pfalz Dialekt-Kolumne: Wieviel mol Wesch wesche isch e Steiererklärung wert?

„Die Frooch, wieviel Maschine Dreckwesch sie wesche muss als Ausgleich defor, dass ich unser Steiererklärung mach, isch Gechesta
»Die Frooch, wieviel Maschine Dreckwesch sie wesche muss als Ausgleich defor, dass ich unser Steiererklärung mach, isch Gechestand vun bilaterale Verhandlunge. « Foto: DPA

Was die Bundesbolledigg vun emme Pälzer Haushalt lerne kann.

Quid pro quo. Des wääß jeder, wu den Film „Das Schweigen der Lämmer“ kennt un/odder sich mit enre Mitbewohnerin en Haushalt däält. „Jelles gebt’s blooß fer selles“, hääßt des uff Pälzisch. Die Frooch zum Beischbiel, wieviel Maschine Dreckwesch sie wesche muss als Ausgleich defor, dass ich jedes Johr im Schwääß vun meim Aag’sicht unser Steiererklärung mach, isch seit sechs Johr Gechestand vun bilaterale Verhandlunge. Des hääßt: Seit sechs Johr babble mer widder direkt, weil unser Rechtschutzversicherunge die Aawält nimmi bezahlen. De Streitwert war zu hoch.

Niemools ohne Zwangsgeldaadrohung

„Wann du die Steier äämool ferdich mache deedscht, bevor die Zwangsgeldaadrohung kummt, deed ich jo mit mir redde losse“, saacht sie so vordergrindich nett un jovial wie de Chrischtian Lindner vun de FDP, der die Woch in Määnz uff’m Neijohrsempfang vun de Wirtschaft in Rheinland-Palz sei Verantwortung fer unser deitschi GroKo-Misere hot klääredde wolle. In Werklichkeit wääß sie naddierlich ganz genau, dass e aaschdänniches deitsches Steierverfahre reechelmeeßiche Mahnunge braucht – so, wie’s e klää bissel Courage vun de Freie Demokratische Baddei erfordert hett, dass mir endlich emol e zeitgemäßi Bundesregierung hetten. Awwer erklären Se des emol em Lindner. Odder meine Fraa.

Im Schleidergang

„Vergleich mich nochemol middem Lindner, un ich polier dir es Glätzel im Schleidergang!“, argumendiert mei Mitbewohnerin. „Des zehlt dann awwer nit zu denne 150 Vollwaschgäng* (*samt Trockne, Bichle un In-de-Schrank-Raame), wu e Johres-Steiererklärung samt Widderspruch grad so uffwieche deeden“, saach ich. „Soll ich dir emol in Rechnung stelle, was es Badbutze wert isch? Un es Blumegieße? Un es Hof kehre? Un es Bettmache? Un es Staabsauche? Un es Koche ...“

140 Vollwaschgäng

„Alla hopp. Saachemer 140 Vollwaschgäng geche äämol die Steier.“ „Im Ehebett schloofe isch e Privileech un kä Selbschtverständlichkeit“, saacht sie. Wu ich druff naus will: Hett de Lindner sellemools uff’m Jamaika-Balkon so hart verhannelt wie mei Fraa heit, wär die dabbich GroKo schunn lang vergesse. Quid pro quo hääßt nämlich irchendwie ach: Vun nix kummt nix. Ich mään jo blooß.

Michael Konrad (52) aus Landau schreibt seit 2007 die wöchentliche Kolumne „Ich mään jo blooß“ in der RHEINPFALZ am SONNTAG.
Michael Konrad (52) aus Landau schreibt seit 2007 die wöchentliche Kolumne »Ich mään jo blooß« in der RHEINPFALZ am SONNTAG. Foto: Iversen
Ihre News direkt zur Hand
Greifen Sie auf all unsere Artikel direkt über unsere neue App zu.
Via WhatsApp aktuell bleiben
x