Rheinland-Pfalz Dialekt-Kolumne: De große Psüchotescht zum Advent
Sinn Sie seelisch un moralisch fit fer die Vorweihnachtszeit?
1. Was isch Ihrn erschde Gedanke beim Thema Advent?a) Verdammt! Jetzt hawwich de Bläck Freidää verbasst. b) Schää. Jetzt bereit ich mich still un froh uff die Aakunft vum Heiland vor. c) Ich saach der’s im Gute: Wann de Unkel X./die Dannde L./de Schwippschwoocher/dein versoffener Bruder sich iwwer die Feierdaach widder bei uns durchfresse wollen, dann hau ich schbeedeschdens am 4. Advent ab uff die Maledive/nooch Neiseeland/in die Fremdelegion! 2. Warum merken Sie iwwerhaupt, dass die Adventszeit aag’fange hot? a) Weil alle Chrischte sich still un froh uff die Aakunft vum Heiland vorbereiten b) Weil die Leit im Volltruwel die Verkaiferinne un Verkaifer in de G’schäfte noch konsequenter un noch uusümbadischer aaraunzen un aabebbren wie es ganze Johr eh schun c) Weil in de Fußgängerzon vun ihre Lieblingswohnstadt die Terrorabwehr eigekehrt isch: griene Bauschuttcontainer voll mit Sand, vorweihnachtlich verziert mit rot-weiße Reflektore (vermutlich geche Geischderfahrer), graue Bauzaungitter (vermutlich geche Wichtel un Vandale) un e paar verhutzelte Weihnachtsbääm (vermutlich geche’s schlechte Gewisse vum Stadtvorstand un de Stadtverwaltung) 3. Was gebt’s an Heilichwoowend? a) E g’fillti Dreipinder Weihnachtsgans mit Rotkraut un Hooriche. Dodezu e paar Weitipps aus de Sunndaachszeidung b) Wienerle mit Grumbeersalat. Dodezu e Pils odder zwää c) E klimaneitrales Schleimsibbel aus regional aagebautem Bio-Hawwer, energieeffizient kalt aageriehrt mit selwer uffg’fangenem Kannelwasser. Dodezu en druckene Vollkornweck vun vorgeschdern 4. Was singen Sie vor de Bescherung? a) „Stille Nacht“ b) „Atemlos“ c) Mir schenken uns dissjohr nix
Die Uffleesung
Wann Se Zeit g’hatt hänn, des zu lese, isch die Hoffnung uff en besinnliche Advent noch nit ganz verlore. Ich mään jo blooß.
