Ich mään jo blooss Verdummbeidelt

Wer darf schon? „Ich bin aagemeld’t un ich wart, bis ich draa bin. Punkt“, sagt unser Kolumnist.
Wer darf schon? »Ich bin aagemeld’t un ich wart, bis ich draa bin. Punkt«, sagt unser Kolumnist.

En Leopard, en Schwippschwoocher un en Fußpilz. So laaft e Impfdebatt mit de Dannde Liesel.

„Bischt du immer noch nit geimpft, du Loddel?“, froocht mich die Dannde Liesel.

„Was soll’n des hääße?“, frooch ich.

„Ich frooch blooß, ob du schunn geimpft bischt.“ Ihr Versuch, uuschuldich se gucke, laaft uff en Leopard naus, wu rechts un links vun de Lefze e halwi Gazell bamble hot.

„Nä, Dannde Liesel, du froochscht nit blooß“, saach ich. „Du saachscht, ich bin en Loddel, weil ich noch nit geimpft bin. Du denkscht, ich hab des verdummbeidelt.“

„Ich kann mich noch an den Daach entsinne, wu du im Schloofazuuch in die Schul geradelt bischt“, saacht die Dannde Liesel. „Un sellemols, wu du deim Juchendschwarm zum Geburtsdaach en selwer getepferte Aschebecher g’schenkt hoscht?“ Sie schiddelt de Kopp. „Du verdummbeidelscht nit blooß, Borsch. Du bischt de Weltmääschder im Verdummbeidle!“

„Beim Impfe gebt’s nix zu verdummbeidle,“ saach ich. „Ich bin aagemeld’t un ich wart, bis ich draa bin. Punkt.“

„Loddel. Ich geh demneggscht danze.“

„Du willscht saache, ich hett mich vordrängle solle? So wie de Herr X., wu vun seim Hausarzt geimpft worre isch, weil er Fußpilz hot? Odder die Fraa Y. mit ihrm pfleechebedirfdiche Unkel in Roschtock? Odder de Schwippschwoocher vum ...“

„Ich hab do e guudi Pilzsalb fer die Fieß. Die helft sogar am Bobb...“

„Stopp, Dannde Liesel! Un du wääscht ganz genau, was ich saache will. Mir geht die Vordränglerei uff de Sender. Un ich loss mir nit vorwerfe, dass ich en Loddel bin.“

„Held vum Volk“, saacht die Dannde Liesel. „Awwer ich geh demneggscht ins Kino.“

„Losse mer’s gut sei“, saach ich. „Sunnscht noch ebbes?“

„Ja“, saacht die Dannde Liesel „Warum hänn dann die Griene den schnuckliche Hagenbeck nit genumme?“, froocht se.

„Ha-beck“, saach ich. „Velleicht, weil er e bissel zu schnucklich isch?“

„Zu schnucklich geht gar nit“, saacht die Dannde Liesel un setzt ihrn Rainer-Briederle-Gedächtnisblick uff. „Un außerdem isch er geimpft! Des hawwich im Fehsbuck vum Goldene Blatt gelese. Du Loddel.“

Unner uns: Ich hab mich schunn lang nimmi so jung g’fiehlt. Muss saache: Werd schwer iwwerschätzt. Ich mään jo blooß.

x