Ich mään jo blooss Echte Kämpfer
„Ich!“, saach ich.
„Ich, ich!“, saacht mein Kumbel Fred.
„Ich! Ich! Ich!“, saach ich.
„Do lachen doch die Hiehner“, saacht mein Kumbel Fred.
„Do missen schun Äbbel kumme un kä Krutze“, saach ich.
„Warum grad du?“, froocht de Fred.
„Weil ich ich bin. Un warum du?“
„Weil ich nit du bin.“
„Pft“, mach ich.
„Pah“, macht de Fred.
„Ksssss.“
„Schnorch.“
„Männer!“, saacht mei Mitbewohnerin un zieht e Aachebrau nuff. Die Druckwell losst die Lampe wackle. „Sinn ihr sicher, dass eier Rollespiel ,Kanzlerkandidatur vun de Union’ werklich so de Bringer isch?“
„Mir sinn authentisch“, saach ich.
„Quatsch. Mir sinn viel besser wie’s Original“, saacht mein Kumbel Fred.
„Ich vielleicht“, saach ich.
„Nä, ich“, saacht de Fred.
„Nä, ich.“
„Ich!“
„Luftbumb!“
„Schnarchsack!“
„Bettsäächer!“
„Hinnerfotz!“
„Ochs, bleeder!“
„Dummbeitel!“
BAMM! Mei Mitbewohnerin knallt e Konnjaggflasch uff de Disch. Sie isch grad am Umfille. Mir kippen de Dannde Liesel seit Weihnachte halwe-halwe Kranewasser in de Noochschub. Des isch a) gut fer ihr Lewwer. Un b) hämmer uns vun de Ersparnis die Daache e Stadtwohnung gekaaft. Awwer des isch e anneri G’schicht.
„Simmer im Kinnergarte odder was?“, froocht mei Mitbewohnerin.
„Der Kindskopp velleicht“, saacht mein Kumbel Fred.
„Rotzbankert!“
„Freckling!“
„Krotzer!“
„Däägaff!“
„Dabbschädel!“
„Doddelkopp!“
E Gewittel! Ich griech grad so richdich Luscht uff die Bolledigg. Ich mään jo blooß.