Kolumnen De Dannde-Liesel-Exit

„Un, Dannde Liesel, was saachscht du zum Grexit?“, frooch ich.

„Redd deitsch mit mir, Berschel!“, bebbert die Dannde Liesel un wedelt middem Konjaggschwenker. Ich gieß nooch. Nummer 3. Es isch mein Beschde. Ich habb vergesse, beim Aldi e Dannde-Liesel-Flasch zu b’sorche.

„De Grexit. Dass Griecheland rausgeht aus’m Euro. Des kummt vun englisch ,Greece’ fer Griecheland un ,Exit’ fer Ausgang. Läscht du dann iwwerhaupt kä Zeidung?“, frooch ich. „Was geht’n dich des aa?“, froocht die Dannde Liesel. „Wann die jedi Woch die Lieche drucken, wu du iwwer mich schreibscht, kammer uff des Bläddel sowie känn Pifferling gäwwe.“ „Ich schreib immer die Wohret, des wääscht du ganz genau“, saach ich. In Werklichkeit bin ich ziemlich mild, was Berichte iwwer mei Dannde aageht. Do geht’s ach um mei Juuchendfreigaab. „Also, was määnscht du zu de Grieche un em Euro?“, frooch ich. „Bleib mer fort mit deim Euro. Alles isch deirer worre mit deim Euro. Soll ich der emool verzehle, was so en Stitzstrump inzwische koscht?“ Die Dannde Liesel kruhschdelt unner ihrm Kiddelschorz rum, als deed se nooch em Preisschild suche. Besser g’saacht: Wann se lang genuuch sucht, deed se’s finne. „Des Geknodder hämmer doch jetzt schunn hunnert mool g’hatt. Heer doch ääfach emool uff mit denne allde G’schichde vum deire Euro“, saach ich. „Ohne de Euro wär Deitschland heit wirtschaftlich nit do, wu’s steht. Kannscht du nit äämool e bissel weiter gucke als bis zum Bännel vun deim eichene Kiddelschorz?“ Die Dannde Liesel guckt uff mei Konjagg-flasch. Ich schenk nooch. Nummer 4. Sie guckt weiter. Nummer 5 glei owwedruff. „Ich verzehl der ebbes, mein Freund“, saacht die Dannde Liesel. Un uuheilvoller kammer des Wort „Freund“ nit betone. „De Unkel hot emool zu mer g’saacht: Wann du die Grumbeersupp noch emool in Stickelscher uff de Disch bringscht, statt se durch die flott Lott’ se dricke, dann kannscht se graad selwer esse.“ Ich guck die Dannde Liesel aa. Sie guckt uugeriehrt zurick. „Mein Freund, dein Grexit isch mir graad scheißegal“, saacht se. Noch en doppelde. Fer mich. Un uff die Wohret! Ich mään jo blooß. (mk)