Kolumnen Aach in Aach (Au in Au, Ääch in Ääch)

Im Friejhohr, do laaft die Nas’, die Bronchie gehen zu, die Aache sähnen aus, als hett mer drei Daach durchg’feiert, un genauso dick isch ach de Kopp. Mer isch wacklich uff de Bää, aatriebsarm un traacht so e uub’schdimmdi Kombination vun Welt- und Gliederschmerz mit sich rum.

So geht’s mir sofort, wann ich „Määnz 05“ heer. Die Säsong isch vorbei, de dabbich Eff-Cee-Kaa kroddelt nochemool mindeschdens e Johr lang in de zwädde Liga rum, un die Nullfünfer kicken im Eirobaboggal. Wie soll des gut gehe? Wu fer mich e Woche-End blooß dann e guudes Woche-End isch, wann nit blooß de Eff-Cee-Kaa gewinnt, sondern ach noch die Määnzer aa-schdännich änns uff de Deckel griechen. Es isch sogar noch schlimmer: En Siech vum Eff-Cee-Kaa isch subber, wiecht awwer noch lang nit mein Ärcher uff iwwer en gleichzeidiche Siech vun dämm Neimodische-Ferz-Verei aus’m Norde. Sie kinnen sich jo iwwer de Daume ausrechne, wie schlecht do in de letzschde Zeit mei Quote war. Jedenfalls: Ich habb mer vorgenumme, dass ich bei dämm Thema e bissel an mir schaffe muss. Eigentlich hot mich mei Mitbewohnerin eher zufällich druffgebroocht, wie se mir erklärt hot, dass sie in de neggschde Saison immer vunn freidaachs bis mondaachs zu ännre Freundin zieht, wann des so weidergeht mit mir un meim pathologische Brass uff die Fußballgoffdel aus de Landeshauptstadt. Also war ich beim Doggder un habb vun meine Määnz-05-Allergie verzehlt, wu sogar mei Eff-Cee-Kaa-Euphorie iwwerstrahlt. Sie hot mer verschriwwe, was mer bei schlimme Allergije halt so verschreibt: e Desensibilisierung: Zieh der gezielt des nei, was dich krank macht, dann lernt dein Körper de Umgang demit. Erschti Woch: dreimool am Daach zeh Minute lang en Määnz-05-Uffkleewer aaglotze. Nooch ämme Schreikrampf un e paar Daach Paus (krank g’schriwwe) Phase zwää: jeden Daach e Verrdel Stunn en Määnz-05-Wimpel sträächle. Geche des Jucke hawwich am Afang e Salb genumme, dann bin ich muudich weider in die dritt’ Woch: e Eitrittskaart fer e Määnz-05-Spiel b’schdelle. In de erschte Nächt’ hawwich als noch e bissel g’heilt, awwer es isch besser worre. In de viert’ Woch ... „Fußball-Bettwesch kummt mer känni ins Haus!“, blärrt die Mitbewohnerin. Wie kammer blooß so unsensibel sei? Ich mään jo blooß. Haaaaatschi.