De beweechte Mann Sportlich, sportlich

„Saachemool“, saacht mei Mitbewohnerin am dritte Daach vun de Weihnachtsseligkeit un klingt debei ganz wie die Dannde Liesel, „saachemool“, saacht se, „willscht du dich nooch drei Daach am Essdisch un uff de Kautsch nit velleicht doch e bissel beweeche?“ Awwer dissjohr bin ich vorbereit’t. „Ich habb mich in dämm Johr vorbildlich beweecht“, saach ich. „Ich habb mich reechelrecht verausgabt. Un des muss lange.“ „Ach?“, saacht die Mitbewohnerin in ämme Ton, der en klänne Ozean zufriere losst. „Ich habb dissjohr in 185 Dischbedierereie mit dir um Worte gerunge.“ „Äh, un?“, saacht die Mitbewohnerin e bissel perplex, was sie zum Glick doch vun de Dannde Liesel unnerscheid’t. „Un in 95 Brozzent vun unsere Dischbedierereie bin ich ins Schwimme kumme. Un wie oft bin ich zurickgerudert!“ „Aaaah“, saacht mei Mitbewohnerin. Sie merkt langsam, wu das Has’ hie laaft. „G’schwumme bin ich, gerunge hawwich, gerudert bin ich. Un ich war ach immer uff’m Sprung – zu meim Kumbel Fred, wann du mir widder kumme bischt mit Raasemeehe odder Sperrmill fortfahre oder Blumekiwwel in de Keller draache.“ „Witzbold“, saacht mei Mitbewohnerin, awwer so leichti Beute bin ich heit nit. „Un ich habb mich jedesmool in die Bruscht geworfe, wann du mir widder de Kopp gewesche hoscht weche ...“ „Heeremool , mein Freund ...“ „Bin ich nit monatelang am Ball gebliwwe un habb mit harte Bandage gekämpft un mich in die Rieme gelecht, bis mir endlich unsern neie Plasmafernseher griecht hänn?“ „Ja, ja“, saacht mei Mitbewohnerin. „Un wie oft hawwich die Seechel g’striche un bin uff dinnem Eis geloffe un habb de Ball flach g’halte. Un jetzt kummscht du un willscht mir verzehle, ich hett nit genuuch Beweechung!“ „Du hoscht e Beweechungs-Sprichel vergesse“, saacht mei Mitbewohnerin. „Du derfscht immer schää nooch meiner Pfeif danze!“ Odder schunn widder e Eichedor schieße. Ich mään jo blooß. mk