Kolumnen Päbäck

Dreifachpunkte fer Klobabbier, dass ich un mei Kundekaart des noch erlääwe derfen! Wann ich norre e greeßeres Audo hett! 40 Baggeede (à zeh Rolle, dreilaachich) hawwich unnergebroocht (zwölfe im Kofferraum, irchend ebbes um die 20 uff de Rickbank, de Rescht uff’m Beifahrersitz un zwää uff meim Schooß), awwer wie ich dehääm alles ausgeraamt g’hatt habb, isch mer eig’falle, dass ich nit blooß die reschtliche 20 Baggeede uff’m Parkplatz vum Subbermarkt habb stehe losse, sondern ach mei Mitbewohnerin. Des hett mir nit bassiere dirfe. Sie war sowieso schunn neggaddiiv eig’schdellt, weil ihre es Verständnis fer die Punktesammlerei doddaal abgeht. Des hot sellemools aag’fange mit dänne 1000 Extra-Punkte fer mein Wohn-Rieschder-Verdraaach beim Geldinschdidutt meines Vertrauens. 1000 Punkte, des missen Se sich emool vorstelle! Fer 1000 Punkte muss ich fuffzich Dreierpacks (3 x 250 ml) vunn däre Bio-Nuss-Nougat-Creme kaafe, wu mir nit schmeckt, odder en hallwe Zentner Duddesupp (Pilzrahm). Awwer mei Mitbewohnerin froocht blooß, fer was mir en Wohn-Rieschder-Verdraach brauchen odder Duddesupp fer bis wann de Russ kummt. Ja, woher soll ich des wisse? Wann’s 1000 Extra-Punkte gäbbt, muss mich des alles nit indressiere. Genau wie mit meine 500 Extra-Meile, weil ich im Baumarkt e Sechzich-Quadratmeter Spanndeck gekaaft habb. So e Geleechenheit kammer sich doch nit entgehe losse. Mer wääß jo nit, ob mer nit emool e Spanndeck braucht. Awwer verzehlen se des ännere Fraa, wu sich die Subber-Guss-pann (Glasdeckel koscht extra) entgehe losse deed, wu mer fer 10.000 Punkte bei de Subbermarktkett X. g’schenkt griecht. Mir hedden heit noch kä so e Pann, wann ich deletzscht nit unser Vorrät an Hering in Tomatesooß uff 4000 Dose hochg’setzt hett (haltbar bis 08/23). Un fer zwannzich Tankfillunge beim Ölkonzern Y. griech ich e Makramee-Blumeampel (mit Alu-Topp)! Es isch doch logisch, dass ich do nimmi an die Tankstell bei uns um die Eck fahre kann. Mein Kumbel Fred isch jo ach schunn unnerwäägs middem Benzinkanischter. Ich steh’ graad ohne Sprit uff’m Standsträäfe vunn de A 65 un sordier mei Rabbattmarke. Noch 20 Stick, un ich griech e Gratis-Hoorkur. Isch des nix? Ich mään jo blooß. mk