En Glickfall Mei Panama-Babbier

Als Schurnalischt griecht mer, wammer sich gut draastellt un viel Glick hot, als emool hoch brisante Informatione zug’schbielt – wie bei de Panama-Pääpers mit de Briefkaschdefirme. In meim Fall hannelt sich’s um e lang verschollenes CDU-Dokument aus’m Johr 1987. Es isch die Daache in meine Poscht gewest, ääfach so, ohne Kommentar. Jemand will, dass die Sach ans Licht kummt. Alla hopp. 1987, die Älldere vun uns entsinnen sich, war es letzschde Johr, wu die CDU im Land bei ännre Landdaachswahl die stärkscht Baddei war. 45,1 Brozzent hot de Voochelbernhard sellemools g’hoolt. Des war zwar en Rieseverluscht im Vergleich zu 1983, wu die Schwarze noch 51,9 Brozzent griecht hänn. Awwer es hot locker zum Weiderregiere gelangt. Dodefor hot de Voochelbernhard blooß middem Brüderlerainer vun de FDP koaliere misse. Jedenfalls: Dass des de Aafang vum End fer die CDU im Land war, hot domools noch känner gewisst. Känner? Unser Dokument beweist es Gechedääl. Mindeschdens än CDU-ler, un zwar en Pälzer, hot schunn vier Johr vorm Scharping seim sensationelle SPD-Wahlsiech vun 1991 kabbiert, dass es vorbei isch mit de schwarze Herrlichkeit. Un er hot en Brass g’hatt. Un mit seim Brass und seim Wisse hot er, wie’s heit aussieht, e Aaleidung formuliert fer jeden baddei-interne Huddel bei de Schwarze in de folschende knapp 30 Johr. Mei Panama-Babbier isch klänner wie Din-A-4, zwääseidich bedruckt, e bissel vergilbt, gut lesbar un werd vun uns demneggscht fer Forschungszwecke ans Landesarchiv ausgeliehe. Es draacht groß de Schriftzuuch „CDU“ un hääßt „Pälzer Schenn- un Schelt-Kalenner, 1987“. In dem Kalenner steht fer jeden Daach vum Johr (außer fer Feierdaach) e Pälzer Schimpfwort, also gut 350 Stick, vun „Affezibbel“ (2. Januar) bis „Stoffel“ (31. Dezember). Zwischedurch en „Stierbeidel“ (26. Februar), e „Linkstootsch“ (4. April), en „Arsch met Ohre“ (25. Juni), en „Großmogel“ (18. September), en „Krageeler“ (20. Oggdoower) un en „Daderich“ (5. Dezember). Unser Rescherche-Tiim huggt zwar noch an de Details, awwer so viel isch klar: Die G’schichte vum Bundesland Rheinland-Palz un vum uuheimliche Uffstiech vun de Roode an die Macht muss in weide Dääle nei g’schriwwe werre. Ich mään jo blooß. (mk)