Kolumnen Krischer un Rechner

E luschdichi Kolumne? Die Frooch isch eher: Wann isch mer des Argument egal, dass ich eichendlich in kännre Woch ebbes Luschdiches schreiwe derf, weil immer ebbes Schlimmes bassiert, weil immer irchendwu die Menschlichkeit noch e Stick määner verlore geht, bis se verschwunne isch wie beim „Islamische Staat“ odder beim Mitmensch, wu määnt, dass „Asylschmarotzer“ erschosse oder, noch besser, vergast g’heerden?

Die Satire-Seit „Der Postillon“ hot am Freidaach unner de Iwwerschrift „Alles wieder gut“ g’schriwwe: „Wie die österreichische Regierung mitteilte, wird der Lastwagen mit 71 erstickten Flüchtlingen, der gestern nahe Wien gefunden wurde, noch heute planmäßig vor Lampedusa im Mittelmeer versenkt. Europäer müssen sich somit über den qualvollen Tod von 59 Männern, acht Frauen und vier Kindern nicht mehr länger den Kopf zerbrechen.“ Des isch genauso brudaal, wie’s de Punkt trefft. Also: Warum fang ich jetzt aa se piense, wu dissjohr schunn zwääehalbdausend Mensche uff’m Middelmeer g’schdorwe sinn? Die Antwort isch: Es gäbbt kä Antwort. Sollen se mir doch vorwerfe, dass ich erscht jetzt zuck, wu’s vor meine Hausdier nooch Verwesung riecht. Es isch mir egal. Ich schämm mich jetzt fer mei Land. Fer die Krischer genau so wie fer die Rechner. Wann saacht die Bolledigg klipp un klar, dass mir in unserm reiche Deitschland, verdammt noch emool, defor do sinn, Mensche in Not zu helfe? Un zwar bedingungslos? Un wann des jetzt halt emool e Milliard Euro koscht odder zehne – es werd uns nit umbringe. Es werd uns noch nit emool wehduu. An ämme Wirtschaftsflichtling, wu e paar Monat zu schbeed widder häämg’schickt werd, isch noch kä G’sellschaft zugrund’ gange. An Brandsätz schunn, an Scheinheiligkeit un an de schweichende Masse. Werd’s e bissel enger in unserm Land? Wer’n e paar Fahrräder määner geklaut? Fallt e paar Woche es Aerobic aus, weil die Turnhall gebraucht werd? Misse mer demit klar kumme, dass zwää Schwarze vor uns durch die Gass dabben? Odder zehne? Odder dass e Rescht-Familie aus Syrie ihr Kinner zu unsre Kinner in de Schul schickt? Ja un ja un ja un ja un ja un ja. Un sunnscht? Muss Deitschland alle Probläme vun de Welt löse? Gechefrooch: Warum sich nit Mieh gäwwe? Mensch sei isch kä Selbschtverständlichkeit, sondern en Uffdraach. Ich mään jo blooß. (mk)