Rheinpfalz Ich mään jo blooss: Im Paradies

O, Oowendland!Ich habb nix geche Fremde, awwer was zuviel isch, isch zuviel. Die sinn iwweraal, die iwwerrollen uns, die sinn – simmer emool ehrlich – uukontrollierbar wie en Heischreckeschwarm. Die kummen aus ännre annere Kulldur, unser Reechle gelten fer die nit. Die hänn, glaaw’ich, noch niemools ebbes g’heert vun unsre G’setze. Un wann doch, dann lachen Se uns ins G’sicht! Dodebei machen die sich doch blooß uff de Wääch, weil bei uns paradiesische Zuständ’ herrschen. Mir sinn fer die es Land, wu Milsch un Hoonich fließen! Un die nämmen, was se grieche kinnen, ganz egal, was es uns koscht. Es werd heggschdi Zeit, dass mir uns wehren! Zentnerweis klauen die es Obscht vun unsre Bääm, die Schmarotzer mit Nummernschilder wie KA, HD, MA, HP un – effder wie’s ämme Pälzer lieb sei kann – ach aus annere Ecke vun de Palz. „Kalumas“ nennt mein Kumbel Fred die Bagaasch, weil se gern aus Karlsruh, Ludwichshaafe un Mannem aarääst. Sie brauchen blooß emool an ämme normale Wochedaach – vum heiliche Sunndaach gar nit se redde – durchs Feld odder durch die Wingert se dabbe. Daimler, Fiat, BMW, Obbel, Audi – es gäbbt kä Klasseschranke. Es sinn fascht immer zwää Leit, manschmool drei. Sie parken am helllichde Daach direkt an de Strooß. De Kofferraum uff, volle Dudde im Arm, vollkommen uuscheniert packen se ei, was neibasst. Känn Abbel un kää Beer un kää Nuss hängt mä am Baam, wann es Gelände nit mit Stacheldroht g’sichert isch. Die holen alles runner un graawen alles aus, druff gepiffe, ob jemand zuguckt. Bevor die e schlechdes Gewisse griechen, fangen se liewer noch Krach aa mit de Konkurrenz, wu vum sellwe Baam klaue will. Ich wart blooß noch, dass se en Bauer, en Winzer odder en Abbelbaamb’sitzer verdreschen, weil der uff seim eichene Grundstick vorsichdich aamerkt, dass des doch eichendlich sei Obscht isch. Des isch kä freundlichi Strenzerei mä, känn klänne Mundraub – ää, zwää, Äbbel stibitzt un beim Spaziere gesse. Des sinn groß aagelechde Plinderunge! Des isch en Aagriff uffs Oowendland! Uff unser Werte! Uff unser Palz! Jetzt gucken Se nit so. Was wohr isch, werd mer jo wohl noch saache dirfe. Ich mään jo blooß. (mk)

Ihre News direkt zur Hand
Greifen Sie auf all unsere Artikel direkt über unsere neue App zu.
Via WhatsApp aktuell bleiben
x