Kolumnen Hääß un kalt

Es war de hääßeschde Daach vum Johr, un wer jetzt glaabt, ich redd vum Wedder, der isch schief gewickelt. Ich bin am Schreibdisch g’huggt mit meine zwää Magnums: ämme 2008er Schbeedburgunder vum X., fascht leer (es war schunn kurz nooch Middaach), un meine .375er Smith & Wesson, fascht voll (e ganz anneri G’schicht). Meine Name isch Dschonni Rapunzel, un ich bin Privatdetektiv.

Die klää Brünett’ isch vor mir g’schdanne wie e Erscheinung. Mir isch hääß worre un dann glei widder kalt, wie se u-agemeld’t die Dier reig’schlabbt kumme isch, un ich habb mir inschdinkdief noochg’schenkt. Es hett mich nit gewunnert, wann die Erscheinung en Satz vun sich gäwwe hett wie: „Du kinnscht emool dein Schrank uffraame!“, un ich musse Ihne saache, des hett ich ach sofort gemacht, wann ich en Schrank debei g’hatt hett. Awwer die letzschde zwää Woche hawwich in meim Büro iwwernacht, un des isch jetzt widder e anneri G’schicht. Wie ich so am Sondiere bin, was die klää Brünett’ mit ihrm kurze Schwarze un ihre Steckfrisur sunnscht noch so zu biete hot un ob se sich nit prima mache deed als mei Mitbewohnerin, zieht se e Aachebrau nuff: „Sie sinn de Dschonni Rapunzel, wu schneller am Schobbe zieht wie e Teichpump.“ Es war kää Frooch, sondern e Feschdstellung, un ich habb gewisst, ich halt jetzt besser die Gosch. Ich habb mit ännre Handbeweechung uff de Klientesessel gezeicht, awwer die klää Brünett’ isch stehe gebliwwe. „Ich brauch’ Ihr Hilf’“, hot se g’saacht, in ämme Ton, als hett se vor mir 20 Schnüffler g’froocht, wu was dauchen, awwer ausgebucht sinn. Odder en sibbde Sinn g’hatt hänn, wie ich jetzt wääß. „Wumit kann ich diene?“, hawwich g’froocht, e bissel umständlicher wie sunnscht, un die klää Brünett hot sich hieg’huggt un missbillichend uff mei Magnum Nummer äns geguckt. Des Stimbel fers Limbel hawwich ihre also nit aasebiete brauche. „Ich habb e Brobläm“, hot se g’saacht. „Es geht um die Dannde Liesel.“ In meine Oodre hot’s Blut uffg’heert se zirkuliere. Werd de Dschonni Rapunzel den Fall aanämme? Spielt die klää Brünett e sauweres Schbiel? Un macht em Dschonni sein Kumbel Fred widder de Krumbel nei? Die Spannung isch nit zu erdraache. Awwer volli Absicht. Ich mään jo blooß. (mk) FORTSETZUNG FOLSCHT

Ihre News direkt zur Hand
Greifen Sie auf all unsere Artikel direkt über unsere neue App zu.
Via WhatsApp aktuell bleiben
x