Kolumnen Anonymer Smartfooniker

Mein Name isch mk, un ich bin en Smartfoon-Besessener. Ich bin änner, wu Daach un Nacht uff’m Dissbläh vun seim Händi rumdattscht, egal, wu ich grad bin un wer graad um mich rumhuggt. Odder steht. Odder licht. Ja, licht! Es war e bitteri Erkenntnis fer mich. Ich habb nie so e Smartfoon hawwe wolle. „Deifelszeich isch des!“, hawwich geplärrt, un iwwer mein Kumbel Fred hawwich mich luschdich gemacht, wann er mir alle zwää Minudde was Wichdiches uff seim Smartfoon hot zeiche misse. Die Börsekurse aus Japan. Es Wetter uff de Falklandinsle. Des Foddo vun de Scarlett Johansson, wie se ... . Standhaft bin ich gebliwwe. Heldehaft hawwich mich gewehrt geche dänn Sooch. Mit meim klare Verstand hawwich argumentiert, dass ebbes, was vor zeh Johr noch känn Mensch gebraucht hot, um glicklich zu sei, uff äämol nit jeder Mensch braucht, um glicklich zu sei. Redde hawwich g’schwunge un Kolumne g’schriwwe, dass ich mei Lebbdaach kä Smartfoon hawwe werr, weil des de Aafang vum End isch, de Unnergang, die Kapitulation. Wie arm isch die Welt, hawwich gekrische, weil allminanner blooß noch in ihr Smartfoons glotzen, weil mer sich nimmi aaruft, fer en Termin auszumache, weil sich die Uffmerksamkeitsspann’ vun ämme Durchschnittspälzer im Smartfoon-Zeitalter eigependelt hot uff 15 Segunne, maximal. Wu war ich? Am Freidaach isch mei Smartfoon kaputtgange un ich hab de ganze Daach Phantomzuckunge g’hatt. Egal, was mir graad in de Sinn kumme isch, immer hawwich sofort in de Jackedasch nooch meim Smartfoon g’fingert fer noochzugucke, was es Indernett dezu saacht. Awwer do war kä Smartfoon un do war kä Indernett, sondern ich war ganz allää mit mir selwer un mit de Gewissheit, dass ich genau in dämm Moment garantiert ach noch en dodaal wichdiche Aaruf verbass. Ich habb mir sofort e neies Smartfoon gekaaft. Un alles war widder gut. 32 Grad in Sidney. Dax uff 10.523,12. Golf in Abu Dhabi. 28 neie Noochrichte. Sechs neue Freunde. Die Scarlett Johannsson immer debei. Mein Name isch mk, un ich ... Moment, ich guck im Internet ... Aacheblick ... ja, do hawwich’s: Ich mään jo blooß. (mk)